جابر ابن حيان أبو الكيمياء

 جابر ابن حيان نموذج مشرف في تاريخنا الإسلامي بإبداعاته في مجالات كتيرة جدًا زي الكيمياء والفلك والهندسة والطب، ومن خلال حلقة النهاردة نستعرض لكم نشأته ودراسته والاكتشافات العظيمة اللي قام بيها ابقوا معنا.

نشأته

ولد جابر ابن حيان عام 101 هجرية الموافق 721 ميلاديا في مدينة طوس بدولة فارس،  ابدع جابر ابن حيان في علوم كتيرة جدًا زي الكيمياء والطب والصيدلة، والهندسة والفلك وعلم المعادن والفلسفة وكانت أعماله نقطة جدل كبير في مجتمعاتنا الإسلامية، وكانت كتبه في القرن الـ14 من اهم المصادر التي كانوا يعتمدون عليها أصحاب الفكر العلمي في الشرق والغرب.

انتقلت أبحاثه المهمة و ترجمت للغات الأوربية عن طريق اللغة اللاتينية، وده كان من أسباب وصف ابن خلدون ليه لما اتكلم عن الكيمياء قال، إن جابر هو إمام المدونين في علم الكيمياء حتى إن الكثيرين أطلقوا على الكيمياء علم جابر ابن حيان مش علم الكيمياء وده من شدة براعته وإبداعه وابتكاراته في العلم ده.

دراسته

درس جابر القران الكريم ومارس مهنه والده كصيدلي وبعد كده درس العلوم على يد جعفر الصادق استاذ العلوم الشرعية واللغوية والكيميائية، مارس جابر الطب أيام الخليفة العباسي هارون الرشيد ودي كانت بداية ممارسته للطب واللي ميز جابر ابن حيان عن باقي طلاب جعفر الصادق في الكيمياء هي طريقته في إبتكار طرق جديدة.

وفي يوم من الأيام أتفق جابر مع استاذه إنه يعرض لزمايله الطلاب أخر إبتكارات عنده وسط كل الحضور، واللي كانت عبارة عن نسخة كتاب صفحاته متتأثرش بالنار بل بالعكس تزداد الكلمات دقة، وبالفعل فجأة أمام كل الحاضرين يرمي عالمنا الكبير جابر ابن حيان النسخة دي من الكتاب في النار، وتنهال عليه صرخات استهجان واستنكار من زمايله علي اللي عمله إزاي حد ممكن يرمي كتاب شكله مميز ومغلف في النار، وقبل ما يحاول البعض إنهم يلحقوا الكتاب ويخرجوه من النار يبتسم ليهم أستاذهم جعفر الصادق إبتسامة كبيرة ويقلهم اطمنوا، بعدها جابر ابن حيان يخرج الكتاب من النار سليم كأن النار لم تلمسه نهائي، بعدها بدأ في توضيح إزاي النار اللي قادرة إنها تحرق ملايين الكتب التانية مقدرتش تأثر ولو بعلامة واحدة على الكتاب ده.

وبدأ جابر ابن حيان يشرح إن ده تم من خلال إجراء التجارب في معملها الكيميائي على أنواع الورق المختلفة، وإنه كان بيستخدم بعض المحاليل الكيميائية اللي اخترعها بنفسه، وفضل يحاول لفترات طويلة جدًا ويغير في الألوان والمحاليل ونخلطهم مع بعض لحد ما توصل لاختراع الورق المقاوم للنار.

إختراعته

لم تتوقف إختراعات عالمنا الكبير لحد إختراع الورق المقاوم للنار، بل قام بإختراع تاني مميز أكتر وهو اختراع الألوان البراقة العجيبة واللي استخدمت بعد اكتشافه ليها في تلوين جدران المعابد والقصور، والأغلفة على المصاحف وقتها وغيرها كتير من مساهمات الألوان البراقة والعجيبة المُكتشفة من قبل جابر ابن حيان في مختلف المجالات واللي جزء كبير منها دلوقتي موجود وبنستخدمه في حياتنا،

اخترع ايضًا العديد من المواد الكيميائية التي كان الهدف منها إنها تحافظ على الملابس والأوراق من البلل، ومواد ثانيه بتحافظ علي الملابس من خطر الاحتراق، وكمان ابدع في تطوير أنواع الزجاج من خلال مواد كيميائية مُركبة بتحافظ علي الزجاج ، بالإضافة لابتكار طريقة صحيحة إضافة ثاني أكسيد المنجنيز على الزجاج لإزالة اللون الأخضر والأزرق اللي بيظهر علي الزجاج و بتزود درجة نقائه وجودته.

تعريف الكيمياء عند ابن حيان

عرف جابر ابن حيان الكيمياء في كتابه  العلم الإلهي قائلًا  "هو فرع من العلوم الطبيعية الذي يبحث في خواص المواد النباتية والحيوانية والمعادن وطرق توليدها وكيفية اكتسابها خواص جديدة".

ووضع ابن حيان نظرية للاتحاد الكيميائي في كتابه " المعرفة بالصفة الإلهية والحكمة الفلسفية " واللي قال فيه ان كتير من الناس بتعتقد انه عند اتحاد مادتين زي الزئبق والكبريت مثلًا تتكون مادة جديدة مختلفة تمامًا وده مش صحيح، وإن كل اللي حصل هو تجزأ واختلاط المادتين مع بعضهم فأصبح من الصعب جدًا للعين المجردة التمييز بينهم وده اللي أدي لظهور المادة الجديدة، وقال ان لو كان في وسيلة تقدر تفرق بشكل دقيق بين النوعين كنا هنعرف إن كل مادة فيهم مازالت محتفظة بشكلها، ودي نظرية تشبه نظرية العالم الذري الإنجليزي " جون دالتون " وده يبين مكانة عالمنا الكبير جابر ابن حيان.

توفي عالمنا الجليل جابر ابن حيان في الكوفة في العراق سنة 815 ميلاديًا بعد حياة امتدت لأكثر من 90 سنة من الإبداع في شتى العلوم.

ودي كانت رحلتنا انهاردة عن تاريخ العالم الجليل جابر ابن حيان

على أن نلقاكم في حلقة أخرى بإذن الله مع عالم اخر من علماء المسلمين والسلام عليكم.

"العلماء العرب في العصر الإسلامي الثاني" من د.سعيد بن عبدالله الشهري 

العلماء العرب د. صبحي سليمان 

https://www.bbvaopenmind.com/en/science/leading-figures/jabir-ibn-hayyan-great-arab-alchemist/